Kutokana na ongezeko la matumizi ya simu tamba na za kisasa pamoja na kuimarishwa kwa mtandao imekuwa rahisi kwa idadi kubwa ya Waafrika kutumia mtandao katika maisha yao ya kila siku. Kwa mfano, watumiaji wa mtandao nchini Nigeria, Misri, na Kenya ni zaidi ya milioni 110, 49, na 43 mtawalia. Takwimu hizi zinaweza kutafsiriwa kama soko kubwa kwa bidhaa na huduma mbalimbali. Kwa bahati mbaya, wajasiriamali wengi na watu wasio na ajira hawana taarifa za kutosha kuhusu jinsi ya kunufaika kutokana na nafasi hii adimu inayoletwa na mtandao. Hivyo basi, makala haya yananuia kutoa maelezo muhimu kuhusu jinsi ya kuanzisha biashara mtandaoni barani Afrika.

 

Manufaa ya Kuanzisha Biashara ya Mtandaoni

  • Gharama zake ni za chini ikilinganishwa na biashara zinazohitaji majumba/maduka.
  • Unaweza kuwafikia wateja zaidi mtandaoni ikilinganishwa na nje ya mtandao.
  • Ni njia mwafaka ya uendeshaji wa biashara saa 24.
  • Biashara zipi za Mtandaoni Ninazoweza kuanzisha Barani Afrika

Kuna orodha ndefu ya biashara za mtandaoni zenye faida barani Afrika. Baadhi yazo ni:

1. Bidhaa za Mapambo na Ulimbwende

online business ideas africa

OnCheck ni duka la mtandaoni liuzalo mitindo ya Kiafrika.

Katika ulimwengu wa kisasa, kila mtu anataka kuonekana vizuri na aingiane sawasawa na mitindo inayovuma. Unaweza kupata pesa kupitia dhana hii kwa kuuza bidhaa kama vile nguo, viatu, mapambo ya vito, bidhaa nywele, marashi, na mikoba. Kulingana na mtaji wako na wateja walengwa, unaweza kupata bidhaa mpya kabisa au hata zilizotumika kiasi.

2. Bidhaa za Uboreshaji Nyumbani

Watu wengi wana hamu ya kupata bidhaa ambazo zinaweza kubadilisha nyumba zao ziwe makazi bora zaidi. Ni dhahiri basi, kwamba pana soko kubwa la vyombo, bidhaa za mapambo ya makazi, na samani.

3. Bidhaa za Watoto

Wazazi wa kisasa wako tayari kugharamika hata ziada ili kuhakikisha kwamba watoto wao wana maisha mazuri. Vifaa bandia vya kuchezea, nguo za kimitindo pamoja na vifaa vinginevyo vya kuwalea watoto vimekuwa sasa mahitaji ya kimsingi, na wala si vya kifahari. Kwa hivyo, mtu anaweza kuwa na biashara yenye faida kwa kuziuza baadhi au nyingi ya bidhaa hizo mtandaoni.

4. Huduma za Ushauri wa Kibiashara

Hii ni mojawapo ya sekta kubwa ya huduma za kitaalamu duniani. Kuna kazi nyingi za ushauri ambazo mtu anaweza kuzishiriki kupitia teknolojia. Hizi ni pamoja na mahusiano ya umma, uongozi, mauzo, kazi, na ushauri wa kimawasiliano.

5. Kutoa huduma za Matukio na Sherehe

Tabaka la kati na juu katika Afrika linazidi kupanuka, na hivyo, watu wengi wananuia kuandaa matukio na sherehe za binafsi au kimashirika yatakayofana. Unaweza kujitoma katika shughuli hii kwa kutoa mahema, viti na vitu vinavyohusiana na sherehe, kukodisha uwanja wa matukio, huduma za upishi, au vifaa vya burudani. Huduma kama hizi zimepata sana uhitaji katika harusi, mazishi, sherehe za kumbukumbu za kuzaliwa, mikutano ya kampuni, na hata mikusanyiko ya kawaida ya familia.

6. Vyakula

online business africa

Mphatso, duka chipukizi Zambia.

Ukuaji wa miji na kuongezeka kwa idadi ya wataalamu ni baadhi ya mambo ambayo yamechangia kuongezeka kwa mahitaji ya maduka ya vyakula mtandaoni. Idadi kubwa ya waajiriwa katika miji ya Afrika iliyoendelea n ahata inayoendelea hukosa muda wa kununua mboga katika maduka yaliyopo mahali maalum. Badala yake, unaweza kutoa uvumbuzi rahisi kwa kuhifadhi bidhaa zinazohitajika na kuwapelekea wateja wako jinsi biashara ya Mphaso, inavyofanya kule Zambia.

Jinsi ya Kuanzisha Biashara ya Mtandaoni Barani Afrika

 

1. Isajili Biashara Yako

Katika hatua hii, unapaswa kuwa umefanya utafiti wa kina wa soko ili kuamua juu ya bidhaa au huduma unazokusudia kutoa pamoja na wateja wako walengwa. Baada ya hapo, hatua inayofuata ni kuisajili biashara hii. Kwa kufanya hivyo, utaihalalisha biashara yako kisheria na hivyo kuongeza nafasi yako ya kupata ufadhili kutoka kwa wawekezaji binafsi au kupata mikopo kutoka kwa taasisi za fedha. Utahitaji pia kusajili jina la biashara, wakati unaposhughulika na ofisi husika za kiserikali na kufanikisha malipo mbalimbali.

2. Tambua Mbinu Mwafaka Mtandaoni

Kulingana na biashara yako, unaweza kuchagua kutumia soko la mtandaoni (ecommerce), au kwa kujijengea tovuti yako mwenyewe, au utumie njia mseto. Masoko ya kimtandaoni ambayo yanaafiki katika Afrika ni pamoja Jumia, Zasttra, Afrikrea, Kilimall, na Bid or Buy. Hata hivyo, kwa kutumia majukwaa mengineyo, itakugharimu ada fulani.

Vilevile, unaweza kujijengea tovuti yako mwenyewe kupitia Shopify, WordPress, WooCommerce na BigCommerce. Mbinu hii itakuwezesha kudhibiti jinsi unavyotaka mwonekano wa tovuti yako uwe. Ni muhimu kutathmini kwanza jinsi tovuti mbalimbali zilivyo kabla ya kufanya uchaguzi dhahiri. Ili kupanua idadi yako ya wateja, unaweza pia kutumia mbinu mesto; ambayo inahusu kutumia soko la mtandaoni na pia tovuti yako binafsi.

online business africa

Unaweza kujijengea duka lako mwenyewe mtandaoni kupitia Afrikrea.

3. Amua Kuhusu Mkondo wa Malipo Unaokufaa

Unaweza kuchagua kupeana akaunti ya benki kwa wateja kuwekea amana ya malipo au kutumia njia hizi za mtandao za malipo kwa ajili ya biashara barani Afrika. Kwa kutegemea nchi ya Afrika unamohudumia, njia hizi za mtandao za malipo zinajumuisha M-Pesa, PesaPal, Skrill, iPay, PayPal miongoni mwa nyingine.

4. Anza kuuza

Usisubiri hadi kila kitu eti kionekana kuwa kamilifu. Kama ilivyo kwa maduka halisi, biashara ya mtandaoni huchukua muda wa kufikia kiwango unachokitaka. Ili kufanikisha mauzo, unaweza kutumia mitandao ya kijamii, maonyesho, punguzo, matukio muhimu, na hata mapendekezo kutoka kwa wateja wa awali. Uwezeshaji wa Kusaka Mtandaoni (SEO) pia ni njia unayoweza kutummia ili kuwavutia watu zaidi kwenye tovuti au duka lako la mtandaoni.

5. Uwasilishaji wa Bidhaa unaoaminika

Kulingana na nchi unamoendeshea biashara, unaweza kutumia usafiri wa umma unaoaminika ili kufikisha bidhaa zilizonunuliwa. Pia, unaweza kuwasiliana na kampuni za kutuma mizigo na bidhaa kama vile Posta nchini Kenya, CourierPlus nchini Nigeria, Rush nchini Afrika Kusini, au huduma nyingineyo ili kuwafikia wateja wako.

6. Kupanua biashara

Baada ya kuhakikisha kuwa biashara imestawi, unapaswa sasa kuangazia jinsi ya kuipanua na kuikuza hata zaidi. Utumiaji wa huduma za wataalamu ili kukidhi mahitaji yanayokua ni mojawapo ya njia bora za kufanya hivyo. Pia, ni muhimu kutathmini tabia za kimatumizi za wateja wako kama msingi wa kuanzisha, kuongeza, au kuondoa baadhi ya bidhaa.

Hitimisho

Sawa na mabara mengineyo, Afrika imepokea uvumbuzi mkubwa ambao msingi wake ni utandawazi na maendeleo ya kiteknolojia. Biashara ya mtandaoni ni mojawapo ya maendeleo hayo. Kwa kuanzisha duka la mtandao, unapata fursa ya kuwafikia wateja wengi sana. Ikiwa utafuata hatua zilizojadiliwa katika makala haya, kama mwekezaji utakuwa umejihakikishia mafanikio ya biashara za mtandaoni.